إسمع يابوش يللي إتگول دادي
تره شيعة علي وسنّة عمر يدرون أنت الضارب علي الهادي
ما تدري العراقي للعراقي إبمهجته وبعمره فادي ؟
يا بوش صحصح تره موش إحنه النتقبّل الذله
إحنه شعب واحد وحبل الوصل باقي وما نفلّه
متحزمين فد حزام ونحط بيك ألف عِلّه
ومن ينجرح شيعي سنّي اليضمده وما يمله
والشيعي يهب وبسبّاح قَلبه يخيّط الجرح للسني ويشلّه
ولتصدّك يشمت إبن تكريت لو حرگوا الحله
ويظل الجبل باربيل شامخ والهور والگصب والبردي ظِله
شعب صاح أبفرد صوت هيهات منّا الذله
لازم تاخذ درس من (عثمان) إبعملة جسر الأيمه
يوم إنتخه.. ذب روحه إبوسط دجله من أجل الخُوّه واللّمه
شنهو شيعه شنهو سنه مادام عراقَي لازم الهَوه يشَمّه
نقذ تسع أرواح وصار الشعب، كل الشعب أُمه
عدنه طبع إنرضّع بالحليب الشرف والغيرة والهمه
لتقيس الشعب من زمره ارتضت وسْكَنتْ بالمنطقه الخضره
أرد اگلك من يطفه (أوچاغ ) المضيف حتما تظل جمره
ومن تغيب الشمس حتما تظل حُمره
خلّك تعاند خلّك تكابر وخلّك تسمع حجي الزمره
تنور( تسواهن) شعل ناره وبانت تره (الگمره)
وفاض العجين وشبع يا بوش بالخُمره
وجا وقت الخُبز وشوف سواعد السمره
حسبالك شعب تافه وتعبّر أفلامك علی الناس؟
عدنه الطفل يفهم بالعلوم وبالذرّه وخِبرة الماس
عدنه المراجل بالوراثة وعدنه الشرف ما ينداس
عدنه الوطن كلشي والشعب تاج إيصير فوك الراس
نتنومس بالشجاع وصاحب الغيرة المايطخ راس
وعار عدنه العمالة ومن الخيانة عدنه مرض وسواس
ونكره الغاصب والمعتدي خصوصا لو جاي من تكساس
تتعايش مستحيل إعلوجك وي أهل غماس
ومستحيل اليشرب (إشنيّنه) يگلك cheers ويرفع الكاس
ومستحيل إتميّع شعب مفطوم عالبارود وقدوته العباس
هذا نبض يسري إبدمنه أبو راس الحار يا شيمه ويرفعة راس
هذا نجل داحي الباب وبن عم العسكري الماينجاس
إحنة شعب مغوار إيد تبني وإيد بيها القلم والقرطاس
ويظل إبن الرمادي والنجف ودهوك فرد إحساس
ويظل (يتخورد الحجي) ويظل عگاله فوگ الراس
عساك طگك حريشي وهودلي ونشله وألم وعطاس
وحق علي الشرقي والهادي والگيلاني والعباس
كلنه عراق واحد أبد ماينداس حتی لو فرقونا بكل بلد راس
الرئيسية 
موضوع: مجموعة جمل الى بوش 
الأحد يوليو 15 2007, 14:15
